Դեսպան Տիգրան Բալայանը մասնակցեց «Հարավային Կովկաս և Եվրոպական միություն․ հասցեագրելով մարտահրավերները և գնահատելով հնարավորությունները» խորագրով համաժողովին

05 հուլիսի, 2023

Հուլիսի 5-ին դեսպան Տիգրան Բալայանը մասնակցեց «LINKS Europe»-ի կազմակերպած «Հարավային Կովկաս և Եվրոպական միություն․ հասցեագրելով մարտահրավերները և գնահատելով հնարավորությունները» (“The South Caucasus and the European Union – addressing challenges, seizing opportunities”) խորագրով համաժողովին, որին հրավիրված էին փորձագիտական հանրության ներկայացուցիչներ Հայաստանից, Վրաստանից և Ադրբեջանից, ինչպես նաև Նիդերլանդներում հավատարմագրված դեսպաններ։ Համաժողովին մասնակցում էին նաև Հարավային Կովկասի եւ Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը և ԱլԳ հարցերով ԵՄ հատուկ ներկայացուցիչ Դիրկ Շուբելը։

Միջոցառումը կազմված էր թեմատիկ քննարկումներից, որոնք անդրադառնում էին Հարավային Կովկասում ԵՄ ներգրավածությանը, դրա հետագա ընլայնման հեռանկարներին, Հայաստան- Ադրբեջան խաղաղության բանակցությունների բրյուսելյան հարթակին։

Առանձին պանելային քննարկումներ էին նվիրված նաև Հարավային Կովկասի երկրների և Եվրամիության հետ երկկողմ հարաբերությունների առկա օրակարգին։

Դեսպան Բալայանը ելույթով հանդես եկավ Հայաստան- ԵՄ պանելային քննարկմանը՝ անդրադարձավ ՀԸԳՀ վավերացումից հետո առկա հավակնոտ օրակարգին, ժողովրդավարական արժեքների ամրապնդմանը, օրենքի գերակայությանն ու իրավական համակարգի բարեփոխումներին։

Անդրադարձ կատարվեց վերջերս Եվրապոլի հետ ստորագրված համաձայնագրին, որի օրինակով առաջիկայում սպասվում է նաև Եվրաջասթի հետ համաձայնագրի կնքում։

Առանձնահատուկ ընդգծվեց ՀՀ-ում ԵՄ դիտորդական առաքելության կարևորությունը, ինչը նպաստում է տարածաշրջանում երկարատև և կայուն խաղաղության հաստատմանը։

Դեսպանի ելույթին հաջորդած ծավալուն քննարկման ընթացքում Ադրբեջանը ներկայացնող հատուկ հանձնարարություններով դեսպան Էլշադ Իսկանդերովը հրաժարվեց հրապարակավ ճանաչել ՀՀ տարածքային ամբողջականությունը, ինչը հստակ արձանագրվեց համաժողովի մասնակիցների կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր